Şəhid valideynləri və qazilər Naxçıvan Dövlət Universitetində dərs keçiblər

Ali təhsil ocağında artıq üç ildir ki, hər il sentyabr və fevral aylarında ilk dərs günü şəhidlərimizin şərəfli döyüş yoluna həsr olunur.

Oxu24.com xəbər verir  ki, Naxçıvan Dövlət Universitetində təşkil edilən bu xüsusi dərs gənclərin vətənpərvərlik ruhunda tərbiyə olunması və şəhidlik zirvəsinə ucalan igid oğulların xatirəsinin yad edilməsi, tanıdılması və təbliği baxımından çox mühüm bir tədbirdir.

Tədbirlə bağlı açıqlama verən Şəhid  mayor Vüsal Vəliyevin qardaşı Elyar İslamoğlu bildirib ki,bu cür dərslər gənclərdə öz vətəninə, xalqına, millətinə qarşı məsuliyyət hissi aşılayır.

"Dünən anam da tələbələrə dərs keçən şəhid valideynlərinin arasındaydı. Universitetdən evə ruh yüksəkliyi, məmnunluqla qayıtmışdı. Ölkəmizin ərazi bütövlüyü, suverenliyi və torpaqlarımızın düşməndən azad edilməsi uğrunda canlarını fəda edən şəhidlərin xatirəsini yaşatmaq, tələbələrə vətən sevgisi aşılayaraq milli dəyərləri təbliğ etmək böyük əhəmiyyət kəsb edir. Tələbələrin şəhid ailələrini və qaziləri dinləməsi, qəhrəmanların həyat hekayələrini onların valideynlərinin dilindən eşitməsi öz vətəninə, torpağına olan bağlılığını daha da gücləndirir. Bu həm də tələbələrə vətən uğrunda verilən mübarizənin və qəhrəmanlığın dəyərini daha yaxşı anlamalarına kömək edir. Belə dərslərin davamlı keçirilməsi təkcə akademik biliklərin öyrədilməsi ilə kifayətlənməyib, həm də mənəvi dəyərlərin təbliğ olunmasına və gənclərin hərtərəfli inkişafına da xidmət edir. Şəhidlərimizin xatirəsinin uca tutulması Azərbaycan xalqının birlik və həmrəyliyini, mübarizə ruhunu daha da möhkəmləndirir. Bu cür tədbirlər gəncləri gələcəkdə vətənə xidmət etməyə, torpaqlarını qorumağa hər an hazır olmağa ruhlandırır. Şəhidlərimizin xatirəsini yad etmək, onları böyüdən valideynlərlə canlı ünsiyyətdə olmaq gənclərimizi ən böyük dəyərə hörmətlə yanaşmağa və gələcəkdə ölkə uğrunda hər hansı bir çətinliklə üzləşdikdə müqavimət göstərməyə hazırlamaq üçün ən doğru yoldur. Naxçıvan Dövlət Universiteti - NDU, Dəyərli Elbrus Isayev, Şəhid ailələrinə, qazilərə göstərdiyiniz diqqətə, hörmətə və qayğıya görə Sizə və gözəl kollektivinizə, şəhid valideynlərini diqqətlə dinləyən tələbələrimizə təşəkkür edirəm.Bu gözəl təşəbbüsə bütün təhsil ocaqlarının qoşulmasını arzu edirəm.",-deyə Şəhid qardaşı bildirib.

 

Nigar